WEEMIN O’ THE WORD
ST LUKE X V42
Miss Mary is the lass, dear freens,
At whom we noo shall look.
An’ try an’ find oot hoo it wuz
That she excell’d the cook.
Wha we beheld some time ago
Daein’ hir level best
Tae get a dainty supper fur
Jesus, their worthy guest.
But we maun aye keep mind, He said,
Nae odds whut some may think,
“Tae dae His heav’nly Father’s will
Wuz juist His meat an’ drink.”
Which He wuz daein’ as He taught
Guid Mary on that day,
Whun chose she the great better pert
That shall not pass away.
Apert frae flurry, ta’k ur show,
She sut doon in the quate,
An’ laid till heart whut Jesus said,
Which made hir truly great.
Though some cal’ hir a lazy lass,
Detestin’ elbow grease;
Whas piety consisted o’
An awfu’ lot o’ ease.
But Christ commended hir, dear freens,
Fur makin’ sich a choice,
So al’ who follow hir fine lead
Hae reason tae rejoice.
Noo juist sit doon an’ meditate,
My sisters big an’ wee,
An’ dae nae rush the work fur show
Keep Mary in yer e’e.
In reverence, purity an’ love,
In faith, in hope, an’ prayer,
An’ may each yin Mary’s reward
Receive fur iver mair.
A.L.F. 2nd September 1916