WEEMIN O’ THE WORD MARTHA ST LUKE X V40

WEEMIN O’ THE WORD
MARTHA
ST LUKE X V40

This time, dear freens, a bizzy lass
Is interduced tae us;
Wha spoil’d hir hospitable work
Bae makin’ too much fuss.

Perhaps she had within hir mind,
Hoo she micht come tae fame;
Ur that hir hame at Bethany
Micht get a bigger name.

She seem’d tae spare nae pains ava
In shovin’ for’t hir best,
Tae spread a table worthy o’
Hir truly Royal Guest.

This Martha as hir name implies,
Juist did the “lady” great;
But got sae cumber’d wae the job,
That, therefore, she wuz bate.

Hir kindliness wuz nae condemned,
Nur cookin’ prime; Ah, no!
But juist beca’s she spent hir time
Maist pertly fur a show.

Alas! this Martha kind o’ style
Has leiv’d here al’ alang,
Yins wha’ micht dae mair sittin’ still,
Ir topsy-turvy thrang.

That Martha wuz a Christian lass,
We dae nae doot ava;
So may the lessons o’ hir wye,
Noo prove a help tae a’.

Especially those sisters dear,
Sae soncy an’ sae fine;
Wha wud dae nearly oucht ava,
If only they micht shine.

So freens shud time an’ space permit,
Some either day we’el sing
Aboot the solid sister Moll,
Wha chose the “needfu’ thing.”

A.L.F. 19th August 1916

Total Page Visits: 264 - Today Page Visits: 1