AT THE BROO

AT THE BROO
Let’s pou’ thegither, Wully,
Let’s pou’ thegither strecht;
Oor days are no’ the langest,
We hae nae time tae fecht.
Why should we glam at nettles,
When there’s roses fresh tae pu’
Alang the windin’ stream o’ life,
‘Mang brammel at the broo?

Let’s pou’ thegither, Wully,
Let’s pou’ thegither fair;
An’ shud we ken a neighbour
Back-burden’d wae despair,
Let’s pluck for him the violet
Sure pledge o’ friendship true
You’ll get it ‘mang the sourocks
An’ fog, alang the broo.

Let’s pou’ thegither, Wully;
What though oor road be rouch,
Though slunks be thick alang it
As sprickellys in a shouch,
Why shud we be doon hearted
While we hae health tae pou’?
You’ll get some stragglin’ pleasures
Alan the rouchest broo.

Let’s pou’ thegither, Wully,
Observe him wha wud steer
His lane alang the tide o’ life,
Withoot advice or fear,
An’ see whun storm clouds gather
He turns baith blae an’ blue;
Nixt thing we hear there’s somethin’ wrang
By splinters at the broo.

Let’s pou’ thegither, Wully;
If wrecked we’ll try tae swim,
An’ haud oor heeds aboun the wave,
Aye lookin’ unto Him
Wha we expect tae greet us
Whun wi’ the wurl we’re through,
An’ grasp the han’ wull lead us
Oot on the ither broo.

Cullybackey Auld Nummer, 27th May 1895

Total Page Visits: 49 - Today Page Visits: 1